Wednesday 19 December 2012

ရခိုင်လူ့အခွင့်အရေးနှင့် ဖွံ့ဖြိုးတိုးတက်ရေးအဖွဲ့မှ (၂)နှစ်လွန် ဂီရိမုန်တိုင်း အစီရင်ခံထုတ်ပြန်


Cyclone Giri two years onရခိုင်ပြည်တွင် ၂၀၁၀ ခုနှစ်က တိုက်ခတ်ခဲ့သည့် ဂီရိမုန် တိုင်းကြောင့် မုန်တိုင်းဒဏ်သင့် မြို့နယ်များရှိ ဒေသခံများ ယနေ့အချိန်ထိ ကြုံတွေ့နေရသော အခက်အခဲပြဿ နာ များနှင့် ပက်သက်၍ ရခိုင်လူ့အခွင့်အရေးနှင့် ဖွံ့ဖြိုးတိုး တက်ရေးအဖွဲ့ (AHRDO)မှ "(၂)နှစ်လွန်ဂီရိမုန် တိုင်း- မြန်မာနိုင်ငံအနောက်ဘက်၊ ရခိုင်ပြည်မှ အသံ များ" အမည်ရှိ အစီရင်ခံစာကို ယနေ့ ထုတ်ပြန် လိုက်ကြောင်း သတင်းရရှိသည်။
ဂီရိမုန်တိုင်း နှစ်နှစ်ပြည့် ဤအစီရင်ခံစာတွင် ဂီရိမုန်တိုင်းမ တိုက်မီနှင့် တိုက်ခတ်ပြီးနောက်ပိုင်းမှ ယနေ့အချိန် ထိ ဒေသခံများ ကြုံတွေ့ခံစားနေရသော စီးပွားရေး၊ ကျန်း မာရေး၊ လူမှုရေး ပြဿနာများကို အများပြည်သူများ သိရှိနိုင်စေရန် အချက်အလက်များအား အသေးစိတ် စုစည်းဖော်ပြထားကြောင်း AHRDOမှ အမှုဆောင်ဒါရိုက်တာ ကိုအောင်မင်းဦးက ပြောသည်။
"ဂီရိမုန်တိုင်း တိုက်ခတ်သွားခဲ့တာ ၂ နှစ်ကြာသွားခဲ့ပြီဖြစ်ပေ မယ့် မုန်တိုင်းရဲ့ဆိုးကျိုးတွေကို ပြည်သူတွေ အခုချိန်ထိ 


ခံစားနေရဆဲဖြစ်တယ်။ အဲဒီလို မုန်းတိုင်းဒဏ်ခံခဲ့ရတဲ့ ဒေသခံတွေ ရင်ဆိုင်နေရတဲ့ စားဝတ်နေရေး၊ စီးပွားရေး အစရှိတဲ့ ပြဿနာ၊ အခက်ခဲတွေကို ကျနော်တို့ အမေးအဖြေတွေလုပ်ပြီးတော့ အဓိက မုန်တိုင်းဒဏ်ခံလိုက်ရတဲ့ မြို့နယ်တွေကို ကွင်းဆင်းပြီးတော့ အချက်အလက်တွေကောက်ယူပြီး၊ အခုဒီစီအရင်ခံစာကို မြန်မာနိုင်ငံ အစိုးရနဲ့ ပါတီအဖွဲ့အစည်းတွေအပြင် နိုင်ငံတကာ ကူညီကယ်ဆယ်ရေး အဖွဲ့အစည်းတွေ သိရှိနိုင်စေဖို့ ထုတ်ပြန်လိုက်ရတာ ဖြစ်ပါတယ်"ဟု အမှုဆောင်ဒါရိုက်တာ ကိုအောင်မင်းဦးက ပြောသည်။
မုန်တိုင်းတိုက်ခတ်ပြီး အရေးပေါ်အခြေအနေနောက်ပိုင်း ပြည်တွင်းနှင့် နိုင်ငံတကာ အကူအညီပေးရေး အဖွဲ့အစည်းများသည် မုန်တိုင်းဒဏ်သင့်ဒေသများမှ ထွက်ခွာသွားခဲ့ပြီး ပြန်လည်ထူထောင်ရေးနှင့် ပက်သက်၍ အစိုးရကလည်း တစ်စုံတစ်ရာ တာဝန်ယူဖြေရှင်းပေးရန် ပျက်ကွက်ခဲ့သည့်အတွက် ဒေသခံများမှာ ယနေ့အချိန်ထိ ယခင်အခြေအနေကို ပြန်လည်မရောက်ရှိနိုင်သေးကြောင်း သိရှိရသည်။
"မုန်တိုင်းတိုက်ပြီးပြီးချင်းတော့ ဟိုကလာလှူ၊ ဒီကလာလှူဆိုတော့ ငတ်လို့မသေဘူး၊ အခု လှူမယ့်သူလည်းမရှိ၊ ပေးမယ့်သူလည်းမရှိတဲ့အပြင် ကျနော်တို့ရဲ့ လယ်ယာတွေက ဆားငန်ရေဖုံးလွှမ်းခြင်း ခံလိုက်ရတဲ့အခါကျတော့ စိုက်ပျိုးစားလို့လည်းမရတော့ဘူး။ လူတွေမှာ စီးပွားရေးအဆင်မပြေမှုတွေကြောင့် အခု ငတ်လို့သေတာ့မယ်လို ဖြစ်နေကြပြီ။ ကျနော်တို့ ပြင်ဝန်းကျေးရွာမှာ လူဦးရေ ၃၀၀၀ လောက်ရှိတဲ့အထဲမှာ စားဝတ်နေရေး အဆင်မပြေကြတာက ၂၀၀၀ ကျောက်လောက်ရှိတယ်။"ဟု မုန်တိုင်းဒဏ်သင့် မြေပုံမြို့နယ် ပြင်ဝန်းကျေးရွာမှ ဒေသခံတစ်ဦးကပြောသည်။
ဂီရိမုန်တိုင်းသည် ဘင်္ဂလားပင်လယ်အော်တွင် ဖြစ်ပေါ်ခဲ့ပြီး ၂၀၁၀ ခုနှစ်၊ အောက်တိုဘာလ (၂၂)ရက်နေ့တွင် ရခိုင်ပြည်နယ်၌ တစ်နာရီလျှင် ၁၂၀ မှ ၁၆၀ မှိုင်နှုန်းဖြင့် မြေပုံ၊ ပေါက်တော၊ ကျောက်ဖြူနှင့် မင်းပြားမြို့နယ်များတွင် အပြင်းထန်ဆုံး တိုက်ခတ်ခဲ့ကာ ချင်းပြည်နယ်၊ မကွေးတိုင်းနှင့် မန္တလေးတိုင်းများအထိ တိုက်ခတ်ခဲ့သည်။ ဂီရိမုန်တိုင်းဒဏ်ကြောင့် ရခိုင်ပြည်သူ အနည်းဆုံး (၂၅၉)ယောက် သေဆုံးခဲ့ရပြီး မုန်တိုင်းဒဏ်ခံရသည့် မြို့ရွာများတစ်လျှောက် လူနေအိမ်များ၊ စိုက်ပျိုးပြီး လယ်ယာများ၊ ရေလုပ်ငန်းများအပါအ၀င် စာသင်ကျောင်းများ၊ ဘာသာရေးကျောင်းများ၊ လမ်းတံတားများနှင့် (၂၀၀,၀၀၀)ကျော် အိုးမဲ့အိမ်မဲ့ဖြစ်ခဲ့ရကြောင်း အစီရင်ခံစာတွင် ဖော်ပြထားသည်။

http://www.arakantimes.net/burmese/index.php/2012-02-24-06-58-57/696-2012-12-20-04-02-58

No comments:

Post a Comment