၁၅ နှစ်ပြည့်သော်လည်း ရခိုင်/ကရင် ခေါင်းဆောင် ၆-ဦး အသတ်ခံရခြင်း၏ လက်သည်တရားခံကို အရေးမယူ နိုင်သေး

By Thaung Krwe
စစ်တွေ ၊ ၁၂ ဖေဖော်ဝါရီ ၂၀၁၃ ၊ Coral Arakan News ၊
 
လွန်ခဲ့သည့် (၁၅)နှစ် ၁၉၉၈-ခုနှစ် ဖေဖော်ဝါရီလ (၁၁) ရက်နေ့တွင် အိန္ဒိယပိုင်နက် အက်ဒမန်ကျွန်း စုအ တွင်းရှိ Landfall ကျွန်းတွင် ဗိုလ်ရာဇာအပါအ၀င် ရခိုင်နှင့်ကရင် ခေါင်းဆောင် ခြောက်ဦး အသတ်ခံရ ကာ တော်လှန်ရေးရဲဘော် (၃၄)ဦးအဖမ်းခံရပြီး တော်လှန်ရေးလက်နက် များစွာ ဆုံရှုံးခဲ့ရသည့် ဖြစ်စဉ်တွင် အဓိကလှုပ်ရှားဆောင်ရွက်ခဲ့သူ အိန္ဒိယထောက်လှမ်းရေး ဒုတိယဗိုလ်မှူးကြီး ဂရက်ဝယ် (Biswajit Singh Grewal) မှာ အပြစ်ဒဏ်ခံရခြင်းမရှိဘဲ လွတ်မြောက်နေဆဲဖြစ်နေသည်မှာ မနေ့က (၁၅) နှစ် တင်းတင်းပြည့် ခဲ့ပြီ ဖြစ်သည်။


ကနဦးသတင်းများအရ ဒု ဗိုလ်မှူးကြီး ဂရက်ဝယ် အား အဆိုပါ စစ်ဆင်ရေးအပြီးတွင် အိန္ဒိယစစ်တပ်မှ ထွက်ခွင့်ပေးခဲ့ပြီး၊ ၄င်း၏မိသားစုများကို အိန္ဒိယနိုင်ငံ ပန်ဂျပ်ပြည်နယ် မိုဟာလီမြို့ (Mohali)တွင် နဂိုအတိုင်းနေရစ်စေပြီး ၄င်းကိုယ်တိုင်မှာမူ မြန်မာအစိုးရက ၄င်းအားထောက်ပံ့သော ဒေါ်လာတစ်သန်းခွဲဖြင့် ရန်ကုန်အနီးတွင် စက်ဘီးအစိတ်အပိုင်းများထုတ်လုပ်သည့် စက်ရုံတစ်ရုံတည်ထောင်ကာ မြန်မာ ထောက်လှမ်းရေး ၏ ကျေးဇူးပြုစောင့်ရှောက်မှုအောက်တွင် နေထိုင်ခဲ့သည် ဟု ကနဦးသတင်းများက ဆိုသည်။

သို့ရာတွင် ၂၀၁၁-ခုနှစ် သြဂုတ်လ နရဉ္စရာသတင်းတစ်ရပ်အရမူ ဒု ဗိုလ်မှူးကြီး ဂရက်ဝယ် အား မြန်မာအစိုးရက အရက်ချက်စက်ရုံတစ်ရုံ နှင့် မွေးမြူရေးခြံတစ်ခြံ ချီးမြှင့်ပေးထားပြီး မန္တလေးတိုင်း မေမြို့တွင် ၄င်း၏ မိသားစု နှင့်အတူ နေထိုင်လျက်ရှိသည် ဟု ဆိုသည်။ ထိုအကြောင်းကို သရက်ထောင်တွင် ထောင်ကျနေသော မြန်မာ စစ်ထောက်လှမ်းရေး အရာရှိ ဗိုလ်မှူးကြီးစန်းပွင့် က အကျဉ်းကျဖက်တစ်ဦးအား ပြောကြားသည် ဟု ထိုသတင်းက ကိုးကားထားသည်။

အမေရိကန်ထောက်လှမ်းရေးဘက် သတင်းရင်းမြစ်တစ်ခု အရ ဗမာစကားကို လယ်လယ်ဝယ်ဝယ် ပြောတတ်သူ ဒု ဗိုလ်မှူးကြီး ဂရက်ဝယ် မှာ မန္တလေးတိုင်း ရွှေဘိုမြို့တွင် မွေးဖွားခဲ့သူဖြစ်ပြီး ၄င်း၏ မြန်မာအမည်မှာ ခင်မောင်မြင့်ဖြစ်သည် ဟု ဆိုသည်။ (တချို့ကလည်း ၄င်း၏ အမည်ရင်းမှာ မျိုးမြင့်ဖြစ်သည် ဟု ဆိုသည်။) ရန်ကုန်တက္ကသိုလ်မှ ဘီအက်စီဘွဲ့ရခဲ့သူ တစ်ဦးဖြစ်ပြီး ယခုအချိန်တွင် သက်ရှိထင်ရှားရှိမည်ဆိုလျှင် အသက် (၆၂) နှစ်ခန့်ရှိမည် ဟု ဆိုသည်။ ၁၉၉၈-ခုနှစ်က ရခိုင် နှင့် ကရင် တော်လှန်ရေးသမားများအပေါ် သစ္စာမဖောက်မီကလည်း ဂရက်ဝယ်သည် ၁၉၉၆-၉၇ ခန့်တွင် မြန်မာတပ်ပြေး လေးဦးကို မြန်မာစစ်အစိုးရထံ ကျုံးသွင်းပေးပို့ ပေးခဲ့ဖူးသည်။ ၄င်းအပြင် ၁၉၉၆-ခုနှစ်တွင်လည်း ကျောင်းသားလှုပ်ရှားသူတစ်ဦးကို သစ္စာဖောက်ကာ စစ်အစိုးရထံ လွဲပြောင်းပေးခဲ့ဖူးသည်။

ထိုကြမ္မငင်သော နေ့ရက်တွင် အိန္ဒိယစစ်ဘက်ဆိုင်ရာတို့က လီဆယ်ပြောသကဲ့သို့ ရင်ဆိုင်တိုက်ပွဲများဖြစ်ခဲ့ခြင်း မဟုတ်ဘဲ၊ အယုံသွင်းကာ သွေးအေးအေးဖြင့် အသတ်ခံခဲ့ရခြင်း အဖမ်းခံခဲ့ရခြင်းသာဖြစ်ကြောင်း၊ ထိုနေ့ဖြစ်စဉ်တွင် အသတ်မခံရသော်လည်း အိန္ဒိယအစိုးရ၏ အထိန်းသိမ်းခံဘ၀ဖြင့် (၁၃) နှစ်ကျော် နေခဲ့ရသော တော်လှန်ရေးရဲဘော်များ၏ ထွက်ချက်များက ဆိုသည်။